紅魔地獄尾站殘晒
今晚英格蘭聯賽盃16強上演曼市打吡，由曼聯主場迎戰衞冕嘅曼城。雖然兩軍近況都唔掂，但曼聯近期經歷地獄賽期堅難捱，今仗去到最後一站，個個都搏到殘晒，最弊係上仗慘吞車仔4蛋，令士氣低落，紅魔主帥莫連奴又同命中注定嘅剋星、曼城領隊哥迪奧拿狹路相逢，難有運行，加上「藍月亮」近6次作客曼聯只曾1敗，今仗誓要勇挫死敵博反彈，平手盤坐和望贏。

(周四凌晨3時開賽、馬會網上文字直播)

曼聯踏入10月迎來魔鬼賽期，先喺聯賽作客守和利物浦0比0，再戰歐霸分組賽主場大勝費倫巴治4比1，但上仗返聯賽造訪車路士大敗0比4，嚴重打擊士氣，而且主帥「寸王」莫連奴對中後場甚少大輪換，主力如迪基亞、艾歷拜利、基斯史摩寧、保羅普巴踢足3場硬仗，消耗極大，來到今仗魔鬼賽期尾站對曼城，眾將已疲於奔命。最慘係艾歷拜利喺對車仔之役傷出，今仗唔使預佢，呢位新加盟嘅中堅表現穩定，曼聯後防冇咗佢真係幾牙煙。

哥帥係寸王剋星
當然曼城近況亦唔好得幾多，連盃賽之前5仗只獲3和2負，但相對於曼聯嘅魔鬼賽期，佢哋耗力冇咁大。除此之外，主帥哥迪奧拿每次對親莫連奴都特別醒神，兩人帶領唔同球隊之前17次交手，單計法定時間，哥帥錄8勝7和2負，絕對係「寸王」剋星。

況且，曼城需要一場勝仗打番起信心，今仗造訪死敵曼聯嘅打吡戰，可謂最佳反彈時機，因為「藍月亮」近6次作客紅魔，錄得4勝1和僅1負佳績，包括今季英超首循環贏2比1，睇嚟喺奧脫福球場上演打吡唔多利紅魔喎，曼城有力贏波殺入8強，繼續衞冕之旅，仲有開平手盤咁筍，一於捧「藍月亮」。