「反骨佬 Vs 獨裁者」好睇過戲
國冠盃聽朝好睇過戲，曼聯喺芝加哥鬥巴黎聖日耳門，原本已經好有睇頭，「紅魔」領隊尹戈爾同聖日耳門射手伊巴謙莫域，繼11年前喺阿積士結怨後再次碰頭，更加被視為「反骨佬」搵「獨裁者」算帳嘅戰爭，今次一於撐復出連續兩場都有波入、狀態大勇嘅伊巴謙莫域成功復仇，支持巴黎聖日耳門客W！（有線61、64、201、203及廣東體育周四早上9:05直播）

經過上季嘅大起大落同季前積極組軍，曼聯早幾日以3:1砌低巴塞隆拿，能夠喺國冠盃連贏3場的確係好叻仔。可惜「紅魔」新簽嘅舒韋恩史迪加有傷，今場未必披甲，想轉會聖日耳門嘅「天使」迪馬利亞又拒絕歸隊，加上喺收購咗羅美路後，門神迪基亞更有可能隨時走人，前中後三線都有隱憂，就算朗尼踢番正箭頭狀態唔錯，今場都好難喺PSG身上搵着數。

曼聯三線存隱憂

白蘭斯倒戈唔想衰
其實睇番聖日耳門除咗想買迪馬利亞之外，呢班波同曼聯仲有好多淵源，單講佢哋個教頭白蘭斯，就係曼聯舊將兼喺奧脫福掛靴，今場倒戈又點會想衰吖？唔只咁，伊巴謙莫域亦同「紅魔」主帥尹戈爾有好大仇口，佢喺成名初期効力阿積士嘅時候，已經勁唔妥當時嘅技術總監尹戈爾，仲試過用「獨裁者」嚟形容對方。難得「戰神」復出後連續兩場入波，係時候有仇報仇！

聖日耳門上場波雖然互射12碼輸咗畀車路士，但歸根究柢係踢美洲國家盃延遲歸隊嘅卡雲尼、堤亞高施華同馬昆奴斯哥利亞只係後備登場，呢幾件主力今戰如無意外會重返正選陣容，配合埋馬高華拉堤、盧卡斯洛迪古斯呢啲好波之人，要爭取表現搵新老細嘅「反骨佬」伊巴謙莫域唔愁冇輸送，尹戈爾，今鋪你唔好彩喇！