今晚賽事唔多，阿King精選過關推介畀大家，以俄超辛尼特主場對加索維克，入球大為重心推介。辛尼特非但係今季俄超唯一不敗之師，且攻力冠絕同儕，10場聯賽共轟入24球。加索維克上輪終於開齋，大振軍心，唔怕同對手駁火，中位數2.5/3球照捧大。

（有線64及203台周二凌晨零時30分直播）

辛尼特上季衞冕俄超失敗，今季捲土重來，充滿霸氣，主場出擊更加係喪攻對手，其中近5次聯賽主場，有4次入到對手3球或以上。一對進攻組合古利安奴、迪斯尤巴已合共轟入11球，堪稱俄超最佳拍檔。不過，後防主將路爾斯尼圖今仗停賽，令防線有隱憂，未必可以保住清白之身。

加索維克開齋心雄
加索維克上仗以3比1擊敗杜莫斯，中場尼卡基克大演帽子戲法，呢位今季新加盟嘅白俄羅斯國腳，表現愈來愈好，成為球隊一大殺着，相信會為辛尼特防線構成威脅，就算今場搶唔到分，都應該可以破蛋。

另外，英甲貝利主場對保頓，貝利狀態衰到貼地，包括盃賽在內，已經連輸5場，反觀保頓4連勝，兼不失球，平手盤梗係捧保頓。

最後就係葡超布拉加主場對查維斯，今季新升班球隊查維斯表現令人驚喜，7場聯賽只係輸過畀勁旅賓菲加，連盃賽在內，作客更3連勝。以布拉加近5次主場僅兩勝走勢，讓唔起查維斯半一，要查維斯下盤。