黃金班底年輕化騷哥利
今夏歐國盃亞軍法國，今晚會喺世盃外歐洲區A組賽事出擊，主場迎戰青黃不接嘅保加利亞。今仗係法國自歐國盃決賽飲恨後，第1次返主場上陣，一眾球星肯定會打爭氣波重拾國民支持。領隊迪甘斯今次點兵將球隊進一步年輕化，骨幹球星亦處於黃金期，讓球主客和法國讓兩球，照捧「讓主」。

（有線61及201台周六凌晨2時45分直播）

法國近年新星輩出，迪甘斯喺歐國盃後加速提拔新人，安東尼馬迪爾、京士利高文、華拉尼等超新星將負起更大責任，23歲中堅拿樸迪亦終於放棄西班牙，選擇代表法國出賽，加上保羅普巴、尼高路簡迪、基沙文等骨幹正值巔峰，連賓施馬、基奧特都冇得入選，就知佢哋兵力幾咁勁，法國依家處於中興盛世，等閒球隊好難阻到佢哋。

歐國盃決賽加時輸畀葡萄牙後，法國首次重返國土比賽，球員想氹番主場粉絲，戰意肯定更加高昂。事實上法國在主場比賽成績向來相當突出，過去13仗主場賽事法定時間錄得11勝2和不敗佳績，表現相當有說服力，以法國球員目前嘅狀態，要大勝一場都唔係難事。

保加利亞麒麟盃出醜
作客嘅保加利亞對上一次參加國際大賽決賽周，已經係2004年嘅歐國盃，可見呢支球隊同世界一線嘅距離，經已愈拉愈遠。連埋歐國盃外圍賽在內，保加利亞對上4仗外圍賽作客輸3仗，今年中參加麒麟盃更被日本狂數7比2及吞丹麥4蛋，輸到面無人色，士氣處於谷底，今仗面對如日方中嘅法國注定冇運行。