尹佩斯拿尼雙魔歐聯衝薩
歐聯第3圈外圍賽今晚上演多場首回合賽事，阿King睇中土耳其豪門費倫巴治主場對烏克蘭薩克達呢場波。費倫巴治今夏羅致幾位重量級球員，相信想喺歐洲賽有啲作為，今仗定必主動爭勝。薩克達踢起狀態，近3場賽事都入到波，作客照搶，阿King估計今場入波唔會少，捧2.1倍大盤。(周三凌晨2時開賽)

上季土超亞軍費倫巴治今夏出手闊綽，先引入前曼聯孖寶尹佩斯及拿尼，再喺巴甲聖保羅搵咗中場祖斯夫蘇沙，同時簽埋法甲里爾後衞卡積亞，使咗咁多錢自然希望喺聯賽同歐洲賽踢出好成績。雖然土超未開咧，但費倫巴治熱身賽表現對辦，當中上仗3比1擊敗法甲馬賽令人印象深刻，今仗主場出戰，點都唔想失禮。

薩克達搶作客入球
薩克達今夏有3位森巴兵杜格拉斯哥斯達、雷斯阿祖安奴同費蘭度盧卡斯離隊，但仍有班納特安尼斯奧、阿歷士泰斯拿同費特洛迪古斯等巴西兵在陣，加上經驗豐富嘅克羅地亞球員達里祖史拉同伊度亞度達施華，實力未見削弱。薩軍近期於聯賽2連勝，今場目標起碼拎番個作客入球先，阿King推介入球大。