國冠盃另一場賽事，墨超球隊CF阿美利加喺墨西哥主場迎戰賓菲加，呢場波睇落冇乜睇頭，但都有投注價值！「里斯本雄鷹」賓菲加喺新帥雷爾維多利亞領軍下，仲未打開勝利之門，變咗隻「頹鷹」，今場作客仲要讓人？咪玩喇！一於捧受讓嘅CF阿美利加！（有線61及201台周三早上10時05分直播）

賓菲加易帥慘成「頹鷹」
人人都知曼聯冇咗費格遜，成績即刻大幅下滑，雖然賓菲加前主帥佐治捷西斯喺球隊地位未必好似費sir咁高，但重要性就一樣嘞。呢位葡籍主帥執教賓菲加6年，助呢隊「雄鷹」大振雄風，佐治捷西斯上任第一年，賓菲加即刻贏得聯賽冠軍，跟住再喺13至14同14至15連續兩個球季奪冠，又贏過葡萄牙盃同葡萄牙聯賽盃。但勢估唔到，佐治捷西斯喺6月宣布由賓菲加過檔死敵士砵亭，情況就好似費sir如果過檔曼城咁，真係激死賓菲加！最尾「里斯本雄鷹」喺甘馬雷斯撬咗雷爾維多利亞過嚟，不過球隊喺佢帶領下嘅3場波，錄得2負1和，其中昨晨有泰臣撐場都不敵紐約紅牛1比2，勁羞家，唔通雷爾維多利亞就係賓菲加版嘅莫耶斯？

睇近況CF阿美利加確係唔好，近3場全敗，包括昨晨喺墨超作客普埃布拉輸2比4，預料教頭安比斯今場會進行輪換，派副選落場搏殺，話唔定會有驚喜喎！今場面對狀態同樣唔掂嘅賓菲加，阿美利加唔係輸硬，博讓球主勝喇！