Justin Bieber踩場撐大眼仔
最近忙於喺倫敦舉行世界巡唱嘅加拿大樂壇巨星Justin Bieber，突然變身阿仙奴小粉絲，繼出席兵工廠中場「大眼仔」奧斯爾生日P後，日前更造訪阿仙奴訓練基地，唔單止「大眼仔」一盡地主之誼，同佢互換阿仙奴波衫及巡唱T恤兼合照，連隊友阿歷士張伯倫亦急急搵Bieber「集郵」。

講開阿仙奴嘅訓練基地，原來主帥雲格鑑於球員成日受傷，特登引入一種叫AirFibr嘅草皮入訓練場，據講AirFibr分為兩部分，底層由細沙、人工微化纖維及軟木粒組成，上面再植入百分百嘅天然草，據講可將球員受傷概率減少20至40%，而且皇馬同里昂都有用呢種新技術，唔怪得之阿仙奴今季少咗傷兵喇。

盧多格德斯未夠班
至於日前聯賽做咗「紅牌阿姑」嘅阿仙奴中場格列沙加，剛被賽會判罰於國內賽事停賽3場，但冇礙呢位瑞士國腳，喺今晚歐聯分組賽A組第3輪主場對盧多格德斯披甲。兵工廠目前2戰得4分，跟巴黎聖日耳門同分放領，為爭取提早出線，阿仙奴挾各項賽事7連勝強勢，面對同組最弱嘅保加利亞球隊盧多格德斯肯定搶得就搶，預計有Justin Bieber打氣嘅奧斯爾更大有可能入多幾粒，斯維相信就算阿仙奴讓2球都冇有怕，照捧讓球主勝。

（有線64及203台周四凌晨2時45分直播）