開咧9仗未輸過
今晚賽事比較冷清，但都有好嘢值得留意，就係法乙勒哈弗爾主場對索察。勒哈弗爾近8仗僅1勝，教練巴特利人緣差，成日被傳媒口誅筆伐，煩都煩死。反觀，索察係今季聯賽唯一不敗之師，認真硬淨，今場仲有得受讓平半，必捧下盤。

（周二凌晨2時30分開賽）

勒哈弗爾上仗聯賽末段入波，以1比0險勝歐塞爾，總算結束包括盃賽在內，連續7仗不勝頹勢。不過，法國傳媒仍然咬住教練巴特利唔放，批評佢戰術部署差之餘，甚至挑剔呢位前美國國家隊主帥衣着冇品味，可見佢去到法國搵食唔多受歡迎，難怪勒哈弗爾成績不濟。

至於索察雖然開季9輪聯賽只係贏過3場，但另外6場都係和波，對手包括前2位球隊蘭斯、比斯特，證明要擊敗索察相當困難。索察唔止防守穩健，前鋒安達亞施馬今季已轟入7球，狀態勇猛，今仗索察隨時贏埋都唔奇。

彭美拉斯爭標反客為主
另外，巴甲懸殊之戰，護級球隊聖十字主場對爭標分子彭美拉斯，雖然話彭美拉斯作客2連敗，但實力始終遠在對手之上，小讓平半上盤仍然博得過。至於哥列迪巴主場對阿美利加明尼路，包尾嘅阿軍取得2連勝，但都係主場，佢哋係今季聯賽唯一作客未贏波嘅球隊，捧哥列迪巴主勝為妙。