意甲「飛驢」基爾禾又起飛，佢哋早於15年前初升上意甲，已有「神奇球隊」稱號，沉寂多年後，獲得「弱隊救星」朗拿度馬倫幫手領軍，成績穩步上揚，今季開鑼戰更爆大冷擊敗國際米蘭，今晚主場對傷兵滿營嘅AC米蘭，隨時又得「米」，平手盤捧基爾禾。

（TVB302周一凌晨2時45分直播）

AC傷兵成籮
今輪意甲前基爾禾排第5位，仲高過米蘭雙雄，其實「飛驢」以往都有唔少「神奇事迹」，2001至02年球季首次升上意甲，憑悅目進攻足球，爆冷獲得第5位，2006年受惠「電話門」假波案，得以後補取得歐聯入場券。不過基爾禾近年一直屬於護級分子，直至前季中途由朗拿度馬倫執教，先至有起色。53歲嘅朗拿度馬倫本身亦充滿神奇色彩，包括2012至13年球季幫卡坦尼亞以破球會得分紀錄，獲得第8名。由「神奇教練」帶領「神奇球隊」，自然擦出火花。

唔只咁，基爾禾前鋒華達比沙當年效力AC米蘭時備受冷落，前季得到基爾禾收留，迎來事業第二春。基爾禾今季擊敗國米，就係靠佢梅開二度，可見佢對米蘭球隊「恨之入骨」，今仗倒戈對AC，肯定更落力。

至於AC，就勁黑仔，隊長蒙杜利禾早前為意大利出戰世盃外圍賽受重傷抖半年，加上中場貝圖拉斯、兩位守將沙柏達華倫西亞、盧卡安東尼利養傷。AC上仗主場險勝薩斯索羅4比3，令球迷嚇破膽，近3次作客基爾禾都贏唔到，對手依家處於強勢，「紅黑兵團」更加冇運行。