國足啞火難炒敘利亞

今晚世盃外亞洲區12強賽A組第3輪，中國喺主場火併敘利亞。頭2仗未贏過嘅中國，主帥高洪波今次冇徵召老大哥鄭智，反而召入杜威、楊旭等而被鬧用人唯親，而郜林及武磊等前鋒近期腳風欠順，但敘利亞亦都唔多識入波，連續4仗總入球皆少於3球，今仗作客隨時玩死守，一於捧入球細（2.5球）。（Now 670周四晚7時35分直播）

客軍殘陣吼細盤
中國頭2仗獲1和1負僅得1分，位列A組第4位，「3哥」南韓亦甩開佢哋3分，想出線就要盡快爭勝，主帥高洪波今次放棄老將鄭智，但召入愛將杜威及楊旭卻受到非議，因2人近期甚少於聯賽上陣，狀態成疑，高帥難免畀人話佢只益自己友。除此之外，國足幾名前鋒亦腳風唔順，連同球會及國家隊賽事，郜林已經連續6仗冇士哥，另一射手武磊亦陷入球荒，想贏都唔容易。

另邊廂，敘利亞雖有進攻主力赫里賓傷愈復出，但單睇之前4仗只入得1球咁大把，全部總入球皆少過3粒，就知佢哋火力有幾弱喇，加上有8名主力缺陣，包括射手蘇馬，作客實擺鐵桶陣，預計今仗會陷入拉鋸，唔慌多波入，揀細盤（2.5球）最好路。