歐聯C組上演「英倫內戰」，蘇超一哥些路迪主場鬥英超榜首曼城，些路迪上輪分組賽慘吞巴塞隆拿7蛋，今輪又遇上「巴塞幫大師兄」哥迪奧拿領軍嘅曼城，恐怕有心理陰影，未踢已經被嚇窒，曼城讓球客勝有買趁早。
（有線63台周四凌晨2時45分直播）
羅渣士踢「華麗足球」冇運行
羅渣士今季執教些路迪，可以高踞榜首，好大程度因為蘇超其他球隊水準較低，不過些路迪去到歐洲賽就變魚腩，對上兩屆都係附加賽出局，其實以佢哋嘅級數，入到分組賽都冇幸福，上輪0比7慘敗畀巴塞，皆因羅渣士「唔識死」，大膽採用地面組織「華麗足球」，結果自取滅亡。今場對曼城，估計情況唔會有大改變。
曼城由哥迪奧拿執教下，變身「英超巴塞」，開季至今各項賽事，10戰全勝，上輪歐聯炒慕遜加柏4蛋，霸氣十足，對住同組最弱嘅些路迪，屬於大炒格。雖然曼城中場主力奇雲迪布尼受傷缺陣，但陣中球星如雲，其中阿古路對慕遜加柏，大演帽子戲法，上仗英超對史雲斯梅開二度。呢位阿根廷射手早前喺本土賽事停賽3場，變相多咗時間休息，依家精力充沛，可盡情射破爆些路迪。
