狐狸發惡贏到波
 
英超示弱 歐戰搶錢
好多人都睇死李斯特城今季會大跌Watt，但度士覺得未必，今晚歐聯分組賽G組次輪佢哋主場硬撼葡超勁旅波圖，主帥雲尼亞里最鍾意扮豬食老虎，隨時又嚟過大翻身變番「猙獰的狐狸」，小讓平半一於捧李斯特城。

(有線62及202台周三凌晨2時45分直播)

老實講，李斯特城要重演上季英超神奇奪冠幾乎冇可能，畢竟其他球隊對佢哋已經加強防範，開局成績一般已露端倪，不過話「狐狸」會成績急瀉，甚至要淪落到護級，度士認為又未至於咁曳，尤其係首度出戰歐聯呢項高水平賽事，必定全力以赴。睇埋李城喺G組首輪被一致睇淡之下，作客大勝布魯日3比0，令人喜出望外。

波圖「恐英症」嚴重
儘管李城喺上周中英聯盃被車仔踢出局，剛於聯賽又大敗畀曼聯1比4，但睇番對紅魔場波落後4球時，主帥雲尼亞里當機立斷，下半場即換走兩大主力馬列斯同占美華迪，留力留到出晒面，而且經過2場不勝後，李城又再次被外界批死冇料到，雲帥最鍾意示人以弱，往往被睇淡嗰陣，又露出「狐狸的尾巴」。

波圖早已今非昔比，唔單止喺葡超只排第3位，今屆歐聯首輪面對實力平庸嘅丹麥球隊哥本哈根，喺打多1個嘅優勢下，仍被對手逼和1比1，睇得出呢支歐聯常客愈踢愈沉，而且波圖有「恐英症」，近9次作客英超球隊只得1和8負，今仗造訪李城難佔甜頭，「狐狸」上盤非常值博。