亞冠盃4強首回合，率先由兩支西亞兵團交鋒，阿聯酋球隊艾阿恩主場卡塔爾球隊艾查殊。雙方好有緣，今屆分組賽都係同組，當時艾查殊兩循環都以2比1擊敗艾阿恩，擺明格食格，加上艾阿恩上兩圈主場都贏唔到，今仗讓波實在制唔過，捧受讓半一嘅艾查殊下盤。
（Now 670周二晚10時50分直播）
艾阿恩最威水時期係奪得2003年亞冠盃冠軍，2005年獲得亞軍，但近年成績欠佳，上屆16強出局。艾阿恩今屆捲土重來，可惜來到4強遇上宿敵艾查殊，雙方分組賽兩次對壘，艾阿恩都係難逃輸波厄運，主場一役更加係半場已經落後兩粒，最後僅靠博到12碼破蛋。艾阿恩連續兩次吃虧，來到今仗淘汰賽，更加唔敢輕舉妄動，應該會以穩陣行先，避免失波冇得翻身。
事實上，艾阿恩今屆亞冠盃主場表現麻麻，16強主場同索柏阿漢打和1比1，靠次回贏兩球晉級，8強主場同塔斯干火車頭悶和0比0，同樣都係次回合作客贏波晉級。無獨有偶，艾阿恩今仗4強首回合又係先主場出擊，隨時又重演上兩圈劇本。
艾查殊人腳有卡士
艾查殊喺16強及8強作客都贏波，兼且防線穩陣保持不失，走勢相當凌厲。呢支卡塔爾富豪球會由前法國國腳林武治執教，陣中擁有曾效力巴塞隆拿、羅馬等歐洲大球會嘅馬里國腳施度基達，仲有前馬賽中堅盧卡斯文迪斯，人腳質素喺亞冠盃呢個層面而言甚高，今場作客有力全身而退，受讓抵玩。
