球星舊生會 歡聚紐約城
南北美洲「球星舊生會」超級歡聚日！美職紐約城主場對奧蘭多城，四大天王「開枱」，紐約城射手韋拿聯同新簽孖寶派路、林柏特，迎戰奧蘭多城中場卡卡，戲碼媲美歐聯。雖然兩位老人家派路、林伯初到貴境，未必踢足全場，甚至可能先做觀眾，但淨係睇韋拿同卡卡重演「西甲國家打吡」，都夠晒吸睛。兩人今季狂數胡，共轟入19球，一場火併在所難免，直取1.9倍入球大。

（TVB 301周一凌晨2時30分直播）

派路林柏特期待首秀
意大利「傳球大師」派路月中正式紐約城簽約後，計劃今仗作為首演，佢日前開始同球隊操練。雖然時間比較緊迫，但呢位36歲老將表明已準備好披甲，至於能否如願，就要由教練克利斯決定。至於37歲嘅林柏特原本兩星期前已可候命，但因小腿受傷，導致仍然未亮相，現時傷勢已經有好轉，或者會安排佢尾段上陣，同fans打招呼。

韋拿重拾巴塞射門鞋
因此，紐約城今仗仍由韋拿孭重飛，呢位西班牙射手今季登陸美職，起初唔多適應，但之後腳風愈來愈順，近6仗攻入7球，目前已有10球進帳，埋門觸覺有番効力巴塞時嘅風範。奧蘭多城防守麻麻，相信韋拿到時會有唔少搵食機會。

卡卡奧蘭多城孭重飛
至於卡卡亦累積9個入球，成為奧蘭多城首席射手，包括首循環對紐約城，射入扳平1球，可見呢位33歲巴西中場寶刀未老。事實上，奧蘭多城靠晒卡卡食胡，預料佢會壓得更前，負責入波。卡卡効力皇馬時，多次同韋拿碰面，當時佢哋只屬C朗同美斯嘅配角，依家做主角，責任更大，勢必更落力爭勝，互相駁火。