柏達邦重新打造捧得過

德乙近日開咧，由德甲降班嘅柏達邦今季重新出發，新主帥、新球員，新人事新作風，今晚會喺主場對戰波琴。波琴有多位主力離隊，包括中場田坂祐介、前鋒科素等，實力大打折扣，一於博柏達邦順利贏波！（周日晚7時30分開賽）

柏達邦喺上任教頭比騰列達帶領下，上季歷史性升上德甲征戰，但最尾都打回原形，喺德甲排包尾做「升降機」跌回德乙。上季結束後，史浩克04騎呢撬走比騰列達，柏達邦惟有搵嚟名宿加賀斯重執教鞭。加賀斯球員時代効力柏達邦，跟住亦做過球隊助教同領隊，對柏達邦一啲都唔陌生。柏達邦今夏有中場尼特真從哈化柏林免費加盟，高大前鋒普舒域斯亦從英格蘭外流回歸，雖然都有卡真加、柏德列施格拿等主力離隊，但相信影響冇波琴咁大，加上波琴近兩次作客柏達邦都被大炒，球員唔多唔少都有心理壓力，主勝值得一捧。

海登咸實力升呢
講開德乙，阿King順便講多兩場畀大家過關，首先係海登咸主場對1860慕尼黑，海登咸今季從ＲＢ萊比錫簽入前鋒法拿恩，加上左閘艾尼費克及翼鋒賀路雲等新兵，實力有所增強，今場應可順利開出主勝。最後就係柏林聯主場迎戰杜塞爾多夫，杜軍近三次對柏林聯皆能保持不敗，今場作客受讓可以秤先。