南美洲方面，巴甲今晚等埋「細哨」回歸首演！朗拿甸奴兩周前同富明尼斯簽約後，掛住夜蒲，連上星期加盟發布會都遲到，搞到會方好尷尬，相信呢位35歲巴西球星應該玩夠，今仗作客查比高恩斯，係時候顯身價報答富明尼斯知遇之恩。加上富明尼斯有得受讓，一於要讓球客勝。（周日晚10時開賽）

朗拿甸奴上季同墨超球隊克雷塔羅解約後，一度冇班落，最終重返巴甲「養老」，加盟富明尼斯。雖然「細哨」年事已高，但始終有一定級數，佢之前由歐洲球壇回流巴西，亦有唔少建樹，包括兩年前助明尼路，奪得南美自由盃冠軍，球迷對佢仍有期望。

查比高恩斯冇本錢讓波
因此，即使朗拿甸奴上星期發布會遲到48分鐘，仍無損球迷對佢嘅熱情。只要「細哨」專心比賽，應可為球隊帶來貢獻。未計昨晚賽事，富明尼斯只係落後榜首明尼路同哥連泰斯2分，為爭標必搏盡。至於查比高恩斯狀態麻麻，已連輸兩場，加上前鋒洛查洛迪古斯今仗停賽，更加咬唔入富明尼斯。