主帥施蒙尼做第4任老竇
馬德里體育會主帥施蒙尼喺當地時間周四收到好消息，就係第4次做爸爸。呢位剛食出「大四喜」嘅阿根廷名帥，今晚將會率領馬體會造訪華倫西亞，一班球員自然會努力爭取入球祝賀佢。不過，華倫西亞兩連勝狀態回升，加上有傳意大利籍主帥柏蘭迪利即將上任，球員自然更搏命爭取表現，阿King推介中位數2.5球嘅入球大。

（Now 632周日下午6時直播）

46歲嘅施蒙尼自與前妻離婚後，搭上比自己細17年、29歲嘅模特兒Carla Pereira同居。施蒙尼雖年過40，但仍然有心有力，Carla日前就為佢誕下女兒Francesca，馬體會今晚造訪華倫西亞，一眾球員自然會搏命爭勝為主帥送上賀禮。不過，華倫西亞自換帥後錄得兩連勝，球隊表現明顯有改善，近日更有傳意籍主帥柏蘭迪利將上任並簽約兩年，一眾球員為喺柏帥面前爭取好表現，一定全力以赴，阿King估計今場入波唔會少，捧中位數2.5球嘅大盤。

大仔踢熱拿亞有着「洛」
施蒙尼嘅囡囡剛出世，而大仔基奧雲尼施蒙尼今季踢意甲嘅熱拿亞，上仗對佩斯卡拉更成功開齋， 旺氣唔弱得過老竇。熱拿亞今晚作客面對有兩位門將艾費特高美斯同米蘭迪都有傷嘅博洛尼亞，縱有前鋒彭迪夫及進攻中場艾迪尼遜安達迪停賽，仍有力反客為主，受讓平半捧下盤。

（TVB 302周日晚上9時直播）

至於意甲壓軸戰由羅馬主場對國際米蘭，四張嘢嘅「王子」托迪上場歐霸盃貢獻3個助攻，證明寶刀未老，加上球隊近6次對國米錄得3勝3和，對住狀態反覆嘅國米有力贏波，捧主勝。

（TVB 302周一凌晨2時45分直播）