數英超近期當紅球隊，利物浦絕對榜上有名！紅軍4連勝之餘喪轟14球，只失3粒，真係人見人怕！連曼聯名宿史高斯都公開讚揚死敵表現，更指利記今季有機會奪標添！今晚利物浦作客第17位嘅史雲斯，讓球盤讓一球都無有怕，1.7倍上盤捧得過。

（Now 621及樂視LeSports HK應用程式周六晚7時30分直播）

史雲斯傳換帥內憂外患
史雲斯近況低迷，近5戰得4負1和劣績，攻不銳時守亦不穩，「天鵝」主席贊堅斯梗係唔滿意，更有傳想搵前曼聯名宿傑斯執掌兵符，取代意大利籍主帥古杜連，球隊正值內憂外患，士氣唔慌好，加埋上季後防大將艾殊利威廉斯今夏轉投愛華頓，冇咗呢位老大哥坐鎮，絕對係「天鵝」防線不穩嘅主因。

利物浦最近狀態大勇，上輪聯賽大炒侯城5比1，連同英聯盃在內最近取得4連勝，就連領隊高普都大讚球隊喺防反戰術上嘅演出稱得上「世界級」添！紅軍能夠搣甩以往嘅「海鮮味」，除後防表現出色外，前線球員個個都射到着晒火！好似今季以3,000萬鎊由修咸頓加盟嘅沙迪奧文尼，呢位塞內加爾新兵至今已經射入3球，仲交出1個靚助攻，短時間之內極速融入，成為紅軍進攻上嘅主要棋子，更成功擊敗咗曼城嘅奇雲迪布尼同車路士迪亞高哥斯達，獲選為英超8月至9月嘅最佳球員，認真厲害！

史高斯公然讚紅軍有冠軍相
紅軍球迷近排固然睇得開心，連曼聯名宿史高斯都出聲讚「死敵」先難得！呢位電視台評述員喺節目裏面，公開話睇好利物浦好有機會捧今季英超冠軍！再睇埋今仗兩隊對碰往績，近7次對賽紅軍5勝1和1負，擺明格食格。無論近況、人腳實力同往績紅軍都佔盡優勢，就算讓球盤開出讓一球都無有怕，一於撐紅軍捉「鵝」成功。