歐聯常客 經驗贏晒
今晚嚟到歐聯第2輪分組賽，戰況一定激烈，今日重心推介場次，係E組俄超班霸莫斯科中央陸軍主場火併英超勁旅熱刺，熱刺嘅歐聯經驗遠遜中央陸軍，但因為名氣較大搞到作客要讓波，肥叔一向認盤唔認隊，中央陸軍受讓平半必撐下盤。

（有線64及203台周三凌晨2時45分直播）

熱刺上季取得英超季軍，得以直入歐聯分組賽，好似迪利阿里等成班生牯仔，予人初生之犢不畏虎嘅感覺。不過有一點值得留意，自2010-11年度球季後，熱刺已連續5屆冇踢過歐聯，單計經驗已輸畀歐聯常客中央陸軍，首仗主場不敵摩納哥有辦你睇，睇嚟呢班小伙子仲要繼續交學費。

名牌效應讓波靠唔住
睇番兩軍歐聯前夕嘅聯賽，中央陸軍被卡斯洛達逼和1比1，中後段攻勢放緩兼換走部分主力，明顯有留力之嫌，相反熱刺贏米堡之役雖作出些少輪換，但孫興民、迪利阿里等主力都搏到最後一刻，體力輸蝕。再睇埋個盤，初盤作客嘅熱刺竟然要讓平半，明顯係名牌效應，引散戶落疊，仲要射手哈利卡尼因傷缺陣，肥叔諗唔到佢哋憑乜嘢讓波。加上中央陸軍近7仗歐聯主場賽事，錄得2勝4和1負佳績，包括賽和曼聯同曼城，對住熱刺更加綽綽有餘，呢個下盤有買趁早。