先發制人最拿手
澳洲足總盃8強今日繼續開戰，衞冕嘅墨爾本勝利會作客賓特利綠軍，爭奪準決賽席位。主隊賓特利綠軍並唔係澳職球隊，但喺2014年曾殺入4強，成績算係唔錯，可惜佢哋今仗對手係澳洲一線勁旅墨爾本勝利，客隊踢澳足盃採搶攻戰術非常湊效，經常可以由頭贏到尾，今仗可以直取半全場「客客」！

（有線64及203台周二下午5時30分直播）

墨爾本勝利貴為上屆澳足盃冠軍，今屆亦過關斬將殺入8強，球隊明顯有一套有效嘅盃賽踢法。墨爾本勝利近7仗澳足總全勝，更加厲害嘅係，佢哋喺呢7仗都係半場已經領先，呢種先發制人嘅踢法往往令對手招架唔住。射手貝利沙上圈一箭定江山狀態大勇，有力帶領墨爾本勝利再晉一級。

賓特利綠軍未夠班
賓特利綠軍都係來自墨爾本，但佢哋只係半職業球隊，論實力絕對低墨爾本勝利幾班，而且球隊目前狀態麻麻，近2仗聯賽都贏唔到波。賓特利綠軍喺2014年曾殺入4強，但當年佢哋喺4強前從未遇過澳職球隊，今屆晉級過程至今同樣避開澳職球隊，可以殺到入呢個階段有幸運成分，今次越級挑戰見真章，睇怕都好難再晉級。