日職「一哥」浦和紅鑽主場迎戰廣島三箭。紅鑽近4仗全勝夾埋入11球，但今仗對手係佢哋嘅「剋星」三箭，勝負難料紅鑽近6仗有5場總入球達3球或以上，所以阿King今仗會向大細中位數2.5球嘅入球大埋手。

（有線61及201台周日下午2時直播）

紅鑽連同日聯盃在內已連贏4場，不過紅鑽防線表現欠穩，近6仗有4場保唔住清白身，因此近6仗有5場總入球達3球或以上。而且，紅鑽近4次對三箭只得2和2負，而當中有3次總入球達到至少3球，可見兩軍碰頭例必鬥攻。三箭近3仗聯賽贏咗兩場，佢哋作客演出好過主場，近4場作客3勝入咗10球，無懼與強敵駁火。

較後時間開波有德甲嘅科隆主場對RB萊比錫，科隆陣中有唔少傷兵，對住表現平穩嘅RB萊比錫應該唔係咁易咬得入。

（Now 672及有線61台周日晚11時30分直播）

最後係意甲嘅費倫天拿會喺主場對AC米蘭，「紅黑兵團」近兩場贏晒表現甚佳，射手卡路士巴卡上仗又有波入，對住主場唔會踢得保守嘅費倫天拿，一於捧大盤。

（TVB 302周一凌晨2時45分直播）