又嚟到熱鬧嘅周末，今晚有101場波咁多，對想玩過關嘅朋友嚟講難免花多眼亂，阿King搵定筍盤益街坊，首推西甲巴塞隆拿作客希杭，呢場擺到明係強弱懸殊，「地上最強」雖有球王美斯缺陣，但周中意外失分谷埋成肚火，誓必當弱旅希杭係「出氣袋」狂打發洩，希軍難逃被大炒厄運，直取巴塞讓球客勝。

（Now 632周六晚10時15分直播）

巴塞「MSN」鋒線美斯、蘇亞雷斯、尼馬有幾厲害唔使多講，但要留意因奧運或受傷等原因，今季只得4場「合體」，不過無礙球隊頻頻報捷。上周中聯賽開快車巴塞硬撼馬體會，於領先之下遭對手逼和1比1，未能乘住皇馬失分而將聯賽積分追近，仲有王牌美斯傷出要抖一輪，真係火都嚟埋。好彩蘇亞雷斯同尼馬一樣咁弗，單計近3仗2人合共入5球，可謂着晒火。事實上，希杭一向對親強隊都跪低，今季曾慘吞馬體會5蛋，而且近4次對住巴塞，輸晒兼狂失13球，就算「地上最強」有歐聯顧慮，但對住遇強即屈嘅希杭仍游刃有餘，巴塞讓球勝值博。

皇馬夠力爆拉斯彭馬斯
至於上周中快車被維拉利爾逼和嘅「一哥」皇馬，則作客拉斯彭馬斯，「銀河艦隊」主帥施丹崇尚進攻足球，進攻手段愈來愈多元化，唔係淨係靠「BBC」鋒線加里夫巴利、賓施馬及C朗數胡，進攻點分得咁散，令對手難以防範。拉斯彭馬斯雖然開咧踢得唔錯，但與希杭一樣遇強腳軟，上季與皇馬、巴塞、馬體會交鋒都輸波收場，皇馬讓球勝乃不二之選。

（Now 632周日凌晨2時45分直播）

最後一關係意甲巴勒莫主場對祖雲達斯，祖記中場馬治斯奧已復操，但今仗仍然唔出得，幸好射手希古恩弗到漏油，上仗又有波入，直取祖記讓球勝。

（TVB 302周日凌晨零時直播）