西甲快車仲有皇家馬德里主場對維拉利爾。皇馬鋒線「BBC」C朗、加里夫巴利及賓施馬（圖）大有機會重新合體，火力全開，尤其係C朗上仗因喉嚨痛唔踢遭喪插，佢咁要面今仗必定搏甩髀，況且近6次聯賽主場對「黃色潛水艇」未輸過兼贏5仗，嗰5場都係至少贏2粒，直取讓球主勝。（Now 632周四凌晨2時直播）

C朗因為於歐國盃決賽受傷抖咗2個月，直至9月中對奧沙辛拿先至復出，因此去到上周中歐聯反勝士砵亭2比1，先係鋒線「BBC」今季首次拍住上，但此役「大聖爺」加里夫巴利受傷，其後C朗亦稱因為喉嚨痛，上仗聯賽對愛斯賓奴亦缺陣，即被粉絲喪插佢，以呢位葡萄牙球星唔衰得嘅個性，實會入多幾粒作還擊。C朗同「大聖爺」已於賽前復操，預計今仗可同賓施馬再合體殺敵。

主場3連勝共轟9球
維拉利爾連歐霸在內3連勝似有復甦迹象，但對手只係皇蘇、蘇黎世、馬拉加之流。相反「銀河艦隊」今季主場威力堅勁，連歐聯在內豪取3連勝，並且一共轟入9球，就算「BBC」之前未能合體，仲有艾華路莫拉達、卻奧斯、莫迪歷及中堅比比、沙治奧拉莫斯分擔重任，今仗有「BBC」歸位，火力更加恐怖，「黃色潛水艇」好難頂得住，皇馬讓球主勝不容錯過。