MSN火併GGG
西甲「重量級快車」開動，兩大爭標分子巴塞隆拿同馬德里體育會今晚會喺魯營球場交鋒。呢兩支超級勁旅近年對賽各有勝負，邊隊都冇必勝把握，不過近期就齊齊開着進攻Turbo，巴塞嘅「MSN」有幾恐怖唔使多講，馬體會亦祭出基沙文、加美路同奧斯華度加坦嘅「GGG」三叉戟，火力全開博中位數2.5球入球大！

（Now 632周四凌晨4時直播）

巴塞隆拿自從排出美斯、蘇亞雷斯同尼馬嘅「MSN」組合後，近2仗先後7蛋贈些路迪同5比1大破雷加利斯，呢12個入波有10個係「MSN」包辦，以佢哋目前嘅狀態，實在好難有球隊可以頂得住唔畀佢哋入波，何況巴塞仲有恩尼斯達、拿傑迪錫呢啲傳送高手，馬體會防守幾堅都冇計。

巴塞防線甩漏多
火力毫無疑問係「地上最強」，但巴塞防線其實都有隱憂，尤其丹尼爾離隊之後，右閘位置成為球隊最大漏洞，中堅烏姆迪迪亦需要更多時間融入球隊，所以巴塞頭4場聯賽有3場失波，包括主場畀貝迪斯同艾拉維斯各轟2球，要贏波惟有用大量入球嚟填補後防不足。

作客嘅馬德里體育會向來以防守見稱，但係近期就全面提升火力，近2場聯賽分別大派4蛋同5蛋，王牌前鋒基沙文同法國同胞加美路組成雙箭頭火花十足，連埋阿根廷新兵奧斯華度加坦上輪正式擔正，呢個「GGG」攻擊線同樣威力強勁，要喺巴塞嘅不穩防線身上搵食唔難，今仗隨時會係入球大激戰！