阿仙奴今晚英聯盃作客英冠仔諾定咸森林，原本強弱懸殊，但森林有前兵工廠「癲鋒」賓特拿倒戈，即刻令場波堅有噱頭。不過阿仙奴就算出新仔都夠贏幾條街，睇怕「中堅賓」難做救世主，斯維直取讓球客勝。

（周三凌晨2時45分開賽）

丹麥箭頭賓特拿出身阿仙奴，可惜自信爆棚變自大，曾豪言只有皇馬或巴塞咁高質素嘅球隊先襯得起佢，得把口唔努力練波，結果近年慘變人球，輾轉效力過新特蘭、祖雲達斯同禾夫斯堡，但冇間撈得掂。今年4月，賓特拿仲畀禾堡炒魷，直至轉會窗關閉前才加盟森林，總算有班落。不過呢位28歲前鋒，近兩仗後備入替都冇貨交，靠「中堅賓」倒戈砌低阿仙奴？咪發夢喇！

小兵哥有質素照炒森林
以往阿仙奴踢聯賽盃經常派新仔，但以艾卡邦、洛賀丁、雲尼艾迪拿迪嘅質素，點秤都贏「師兄」賓特拿同森林眾將，而佢哋都想趁機爭取表現博上位，一定搏甩髀。況且阿仙奴主帥雲格近年開始轉死性，有時會派出具經驗嘅球員傍住班新仔，好似上仗冇踢嘅基奧特、阿歷士張伯倫，甚至新兵盧卡斯佩雷斯都有機會披甲，要大勝森林絕對冇難度。