干地拜錯師索料反露底
英格蘭聯賽盃第3圈即上演大戰，「狐狸」李斯特城主場對車路士，兩位意大利名帥雲尼亞里、干地正面交鋒。查實兩位鄉里老友鬼鬼，干地今季登陸英格蘭前，曾經請教雲尼亞里有關車仔情況，雲帥可以話係干地嘅「盲公竹」，變相亦對干地處境瞭如指掌，加上「狐狸」近期連接於歐聯及英超取得大勝，重拾上季神奇本色，反觀車路士狀態走下坡，形勢高下立見，Mic少捧李斯特城主勝。

（周三凌晨2時45分開賽）

雲尼亞里曾於2000至04年執教車路士，上季幫李斯特城捧英超，干地乘機「拜雲尼亞里為師」，自爆聯賽開鑼前聯絡過雲帥，收集有關車仔嘅資料，同埋點樣適應倫敦生活。表面上，雲尼亞里「過料」畀干地，似乎幫咗對手，但其實佢亦可從中了解干地面對嘅問題同不足，將來交鋒可作出針對部署，於聯賽交鋒之前，今仗可率先大派用場。事實上，雲尼亞里喺英格蘭教波及生活經驗，正係比干地優勝嘅地方，唔怕「過江龍」來犯。

最重要係李斯特城已擺脫「季初病」，繼首次出戰歐聯大勝布魯日3比0後，上仗英超又贈般尼3蛋，新兵施利文尼梅開二度，表現對辦，唔需再依賴占美華迪數胡，球隊多咗攻擊點，更令對手防不勝防。由於李斯特城只屬細球會，唔似一眾豪門嫌棄盃仔，就算隨後周六晚英超鬥曼聯，相信今仗仍會全力爭取贏波晉級。

藍戰士留力砌阿仙奴
車路士由干地領軍下，「蜜月期」已過，近兩仗英超僅逼和史雲斯2比2，並且以1比2輸畀利物浦。車仔最大問題係防線唔及以往穩健，包括盃賽在內，今季6戰有5戰失波，加上中堅泰利有傷，用輕出嘅大衞雷斯鎮守中路，更令球迷唔多放心。此外，車路士將於周六晚英超硬撼死敵阿仙奴，大戰在即今仗難免有所顧忌；以車仔豪門地位，肯定以英超行先，今場踢盃仔可能派部分副選應戰，實在信唔過，「狐狸」3.3倍冷W值博。