強陣作客屈福特
今晚英超頭場上演屈福特主場鬥曼聯，「紅魔鬼」曼聯上仗歐霸盃輸畀飛燕諾，被批評到體無完膚，但明眼人一睇就知領隊莫連奴根本志不在呢隻「二奶盃」，因為目標只有一個，就係捧英超冠軍，相信「寸王」今仗會排出強陣搶3分，省番靚金漆招牌。不過曼聯讓到一球略嫌太辣，特別係屈福特鬥心強，對勁旅亦唔退縮，早前對車路士及阿仙奴都有波入，因此Mic少推介中位數2.5球入球大。

（Now 621及樂視周日晚7時直播）

曼聯上輪英超1比2不敵曼城之後，上周中歐霸盃又輸埋畀飛燕諾，但要留意「寸王」該仗正選陣容收起朗尼、伊巴謙莫域、費蘭尼、路爾斯華倫西亞、戴利白蘭特及勞基梳爾等常規人腳，擺明無意爭呢項盃賽，所以唔好因為上仗輸得肉酸而睇淡曼聯。事實上，莫連奴忽視歐霸盃，同時令一眾主力有機會輪休，對爭奪英超反而係好事；特別係伊巴謙莫域、朗尼都年過三十，畀佢哋專注踢聯賽，應會有更佳發揮。其中伊巴謙莫域今季英超已轟入4球，今晚隨時又有斬獲。

屈福特唔退縮鬥攻
另一邊廂，屈福特今季改由馬沙利執教後，大踢悅目足球，包括盃賽在內5戰都取得入球，上仗聯賽落後兩球劣勢下，連追4球作客反勝韋斯咸4比2，打開今季勝利之門，大大振奮軍心。最難得係屈福特遇上勁旅都唔畏縮，上月對車路士更先開紀錄，可惜臨尾失兩球輸1比2。其後鬥阿仙奴，即使半場落後3球，最終都可以破蛋。屈福特中場伊天卡普爾腳風極順，已經有3球進帳，主隊今仗或者唔夠曼聯砌，但入波機會仍然樂觀，捧大盤啱數。