C朗倒戈冇面畀
今晚歐聯聚焦F組，上屆冠軍皇家馬德里主場迎戰葡超士砵亭，主角肯定係皇馬球星C朗，因為佢今仗倒戈母會。呢位葡萄牙隊長唔熟唔食，9年前歐聯分組賽，佢為前度球會曼聯兩鬥士砵亭都射入致勝球，該屆歐聯紅魔鬼最終捧盃。今次C朗再遇「貴人」，梗係要食住上盡情數胡，為衞冕打響頭炮，Mic少直取皇家馬德里讓球主勝。
（有線62、202台周四凌晨2時45分直播）
公私分明全力數胡
C朗為葡萄牙奪得歐國盃冠軍後，因傷抖咗兩個月，專心休息兼叉足電，果然上仗西甲復出開波6分鐘就入波，協助「銀河艦隊」大炒奧沙辛拿5比2，證明C朗心理及身體狀況都已做好準備，為新球季搏殺。皇馬衞冕歐聯第1場即遇上C朗母會士砵亭，亦係一大喜訊，事關C朗非常熟悉士砵亭踢法，佢日前已講明要進行公正嘅比賽暫時唔講恩情，即使士砵亭一手栽培佢，但落場交鋒一樣射爆對方。事實上，2007至08年嘅歐聯賽事，C朗就為曼聯兩次對戰士砵亭，結果兩仗都有波入，幫紅魔鬼雙殺對手，可見球場上嘅C朗的確公私分明。
除咗C朗猛虎出柙外，另一位射手賓施馬亦已傷愈，上仗西甲有後備上陣催谷狀態，再加上一直托弗嘅加利夫巴利，今場「BBC」齊腳實力有保證。此外，皇馬前線仲有今季回巢嘅艾華路莫拉達，「銀河艦隊」鋒線有人滿之患，各人為爭正選，勢必搏盡。翻查紀錄，皇馬近3屆歐聯分組賽共9仗主場賽事錄得全勝，其中6仗贏3球或以上，今仗似乎又係大炒味濃。
士砵亭未夠班聽炒
至於士砵亭只係上季葡超亞軍，實力同皇馬相比有一大段距離，佢哋對上5次參加歐聯，只有1次晉級16強，上屆更加喺附加賽階段已經出局，根本唔入流。士砵亭近4次歐聯作客亦只有1和3負，值得一提，士砵亭最近1次歐聯作客皇馬，係2000年10月上演嘅分組賽，結果敗慘0比4而回，今仗客軍真係凶多吉少。
