6大豪門夜以繼日好波3連擊
國冠盃由今晚至聽朝上演重炮3連擊，六大豪門好波獻給你！呢3連擊中，最吸睛一戰肯定係「北美站」巴塞隆拿對曼聯。巴塞曾於09及11年歐聯決賽兩挫曼聯，看似食住紅魔，但巴塞今次冇咗美斯、尼馬、馬斯真蘭奴、丹尼爾，攻守能力打折扣。反觀，曼聯陣容齊整，4大新兵愈戰愈勇，加上領隊尹戈爾教過巴塞，深知對手實虛，一於撐曼聯客勝威番次。（有線61、64、201、203台周日凌晨4時05分直播）
冇美斯尼馬 巴塞唔夠揪
巴塞隆拿上仗2比1擊敗洛杉磯銀河，孭飛嘅蘇亞雷斯入咗1球，不過對住實力較弱，又需要兼顧本土賽事而未盡全力嘅銀河，巴塞都只能夠小勝，表現難以令人信服，今仗鬥實力高銀河幾班嘅曼聯，先至係「地上最強」嘅真正考驗。巴塞上季能夠成為3冠王，美斯、尼馬居功至偉，冇咗呢兩大球星，球隊即時「降晒呢」，三叉戟中唯一有份角逐國冠盃嘅蘇亞雷斯喺鋒線上獨力難支。更何況防線兩位正選馬斯真蘭奴、丹尼爾都缺陣，呢支巴塞實力可謂打個6折，撞正齊晒腳兼戰意旺盛嘅曼聯，肯定好難踢。
新援對辦 小豬中場指揮
曼聯比巴塞更早開操同到達美國，備戰較充足，踢咗兩場國冠盃都勝出，表現四平八穩。最難得係4大新援都能迅速融入球隊，其中舒尼達連同迪比更已取得入球，表現相當對辦，今仗鬥勁敵巴塞，相信尹戈爾會以舒韋恩史迪加喺中場領軍。
「小豬」以往為拜仁多次鬥巴塞，對巴塞實力相當了解，而上屆歐聯4強被巴塞淘汰亦令呢位德國隊長耿耿於懷。今仗有機會再遇死敵，點都想贏番次。另尹戈爾曾於97至2000年曾執教巴塞，巴塞教練安歷基正係佢麾下一員，「徒弟」有幾多斤両尹帥一清二楚，今場師徒對決，尹戈爾秤高一線，強捧曼聯客W。
