金盃季軍戰埋牙！
美洲金盃今屆突然復辦季軍戰，唔通賽會知道美國會大熱倒灶？佢哋喺準決賽爆冷不敵牙買加出局，粉絲大失所望，另邊廂嘅巴拿馬聲言係「被屈」出局，兩隊都有怨氣，睇嚟要大爆發整番場入球騷先得，博1.82倍入球大。（開賽時間：周日凌晨4:00）

自91年創辦嘅美洲金盃，12屆之中美國得3屆未能進身決賽，而嗰3屆都有巴西、哥倫比亞等南美過江龍參賽，所以「花旗軍團」今屆成績可以話係史上最差，幸好季軍戰停辦5屆後，今屆突然又踢番，正好畀多次機會美國安慰番班球迷！

美國球迷叫奇帥辭職
事實上，美國不敵牙買加出局，領隊奇連士文飽受壓力，更有輿論指佢應該引咎辭職，但樂比仔認為奇連士文帥位暫時都好穩陣，為咗班粉絲，相信佢一定會盡力領軍打好呢場季軍戰，唔會再畀傳媒有藉口批評，況且老將丹普西今屆已經射入6球，喺射手榜lead住墨西哥嘅古亞達度1粒，落到場肯定博盡爭取士哥，拎番個安慰獎嘛。

至於巴拿馬喺今屆賽事表現出色，90分鐘內保持不敗，5場賽事全部開1:1，不過班波喺4強加時以1:2不敵墨西哥場波真係夠晒爭議性，對手嘅兩個入波都係12碼，而且上半場亦有球員領紅被逐。本來巴拿馬喺補時階段輸球冤枉12碼後，班人躁爆打算拉隊離場，不過擾攘10分鐘後，始終決定踢埋佢，賽後看台上嘅兩方球迷亦發生衝突。

巴拿馬「被屈」出局
直到依家，巴拿馬依然吞唔落呢啖氣，揚言要杯葛季軍戰，不過樂比相信呢場波最終都會打得成，事關喺大型賽事罷踢後果非常嚴重，隨時會被FIFA重罰及停賽，相信佢哋今場都會盡情發洩怒火，季軍戰開大可謂合情合理。