一年一度嘅酋長盃今晚開打，東道主阿仙奴首仗面對里昂。「兵工廠」雖有阿歷斯山齊士缺陣，但奧斯爾、基奧特同禾確特等戰將會悉數披甲，對住有拿卡錫迪領銜鋒線嘅里昂，喺鼓勵入波嘅酋長盃賽制之下實大把「士哥」，1.57倍大要捧場。（TVB301周六晚11:20直播）

小將艾卡邦博上位
由阿仙奴舉辦嘅酋長盃，今屆有里昂、維拉利爾同禾夫斯堡參戰，賽事鼓吹進攻足球，每入1球都有1分，踢落肯定唔慌保守。兩位踢完美洲盃嘅哥倫比亞門將奧斯賓拿同智利國腳「A山」仲放緊假，不過睇見「兵工廠」先後大勝新加坡明星隊同愛華頓勇奪英超亞洲挑戰盃，就知呢隊波已經撻到行晒。

領隊雲格話，今次酋長盃除咗會派辛迪卡索拉、「禾仔」同基奧特等主將上陣之外，仲會畀機會艾卡邦等小將落場，呢位生牯仔對新加坡明星隊連中三元，難得有機會上陣嘅話肯定搏盡取悅「教授」。

里昂拿卡錫迪留隊
對家里昂係上季法甲亞軍，季前佢哋羅致咗甘岡鋒將比奧維同馬賽左閘莫雷，人腳比起去季更鼎盛。最重要係當今歐洲最炙手可熱之一嘅前鋒拿卡錫迪，唔騷巴黎聖日耳門、阿仙奴同利物浦，堅決宣布留效，有呢位超級射手衝鋒陷陣，今場同「兵工廠」班友駁火肯定大把波入。