2018年世盃歐洲區外圍賽，今晚正式拉開戰幔，當中身處F組嘅「三獅兵團」英格蘭，則要作客硬撼斯洛伐克，今仗亦係英軍新帥艾拿戴斯首度領軍信心爆棚，更提早公布正選陣容，加上英格蘭有「新帥效應」堅旺場，之前8任領隊接手後首仗均旗開得勝，1.77倍客勝冇甩拖。

（有線61及201台周一凌晨零時直播）

英軍於今夏歐國盃16強爆冷輸畀冰島1比2，領隊鶴臣劈炮後一度無人敢接呢個「三煞位」，最終由新特蘭領隊艾拿戴斯「接火棒」。

信心爆棚提早公布正選陣容
「大Sam」草根出身，擅教小球會，而且作風大膽兼敢言，今仗歐國外首輪作客斯洛伐克，係佢接手後首場賽事，不過波都未開，佢就提早公布正選11人名單，唔單止棄用占美華迪，續用哈利卡尼打單箭頭，隊長朗尼、史達寧、佐敦軒達臣、史東斯全部擔正，連剛啱喺轉會窗被曼城放棄、外借去拖連奴嘅門神赫特，亦獲信任打正選，咁早畀對手知道陣容都唔怕，果然係信心爆棚。

同時，英格蘭新帥第一擊特別旺，唔計看守領隊，睇番前8任領隊鶴臣、卡比路、麥卡倫、艾歷臣、奇雲基瑾、荷杜、雲拿保斯及格拉咸泰萊，首騷全部贏波，艾拿戴斯點秤都勁過庸帥麥卡倫、格拉咸泰萊，加上近4次英軍對斯洛伐克獲3勝1和未輸過，客勝梗係有買趁早。