主場出擊有料到
周六雖然有好多場波，但阿King睇中咗第二朝先開波嘅美職。費城聯門將安達比歷克因為畀牙買加國家隊徵召而缺陣，對球隊後防影響甚大，今仗作客芝加哥火燄相信難以全身而退，阿King熱捧火燄主場贏波。

（TVB 301周日早上8時30分直播）

費城聯門神要踢太公波
美職唔少球隊都有球員被徵召踢國際賽，費城聯門將安達比歷克同中場艾真度比杜亞要踢「太公波」，前者一向表現穩健，係球隊現時可以喺東岸排第4嘅功臣，佢今場踢唔到將大大影響費城聯嘅爭勝機會。

火燄上仗雖以2比6慘負於華盛頓聯隊，但呢班波主場成績其實唔錯，近10戰5勝5和。火燄無疑有主力射手艾卡姆被加納國家隊徵召，但前線仍有蘇歷加力及米高迪利奧可上陣，面對後防不穩嘅費城聯有力破門，要主勝。

同日較早時間開波有溫哥華白帽主場對紐約紅牛，兩隊今仗都有唔少球員被徵召踢國家隊。白帽今仗即使有6名球員要踢國家隊缺陣，但仍有中場柏度摩拉利斯、前鋒工藤壯人及德查拉可望披甲，面對有中場大將基捷斯坦缺陣嘅紅牛，加上近6次對紅牛未輸過，主場出擊有望贏波。

（TVB 302周日早上7時直播）

至於較後時間舉行嘅洛杉磯銀河主場對哥倫布機員，銀河最近有中場尼祖迪莊離隊，射手羅比堅尼剛踢完國家隊告別戰，未知能否趕及重披戰袍。機員今仗雖有唔少球員缺陣，但中場費迪歷高希古恩傷愈應可復出，作客銀河有望搶到分，捧讓球客勝。

（TVB 301周日早上10時30分直播）