法國強陣作客殺意濃

另一場國際熱身賽好戲碼，意大利由新帥雲杜拿首度領軍，主場對法國！68歲嘅雲杜拿40年教練生涯，大部分時間執教細球會，而且往往兩三年就冇得撈，直至近5年擔任拖連奴主帥，先至做得長。雲杜拿嘅級數及魅力同以往意軍主帥干地、柏蘭迪利、納比、查帕東尼有一大段距離，是否夠感染力，激勵球員踢出士氣，實在令人懷疑，加上意大利一向唔重視熱身賽，最好揀法國客勝。

（周五凌晨3時開賽）

意大利雲杜拿試新人
意大利整體人腳麻麻，今夏歐國盃全靠干地激情領軍，令全隊團結一致，踢出超水準。雲杜拿教開細球會，未見過大場面，依家要指揮以祖雲達斯球員為骨幹嘅意大利，恐怕難以令眾星信服佢。雲杜拿今次亦揀選唔少新兵，包括AC米蘭17歲門將基安盧基當拿隆馬，仲有兩位廿歲出頭嘅後衞阿利斯奧羅馬洛尼、魯加尼，同埋22歲前鋒比洛迪，睇來雲帥有意試用新人，改善意軍老化問題，試陣味甚濃，更加信唔過。

法國球星如雲，基沙文、保羅普巴、基奧特、皮耶、尼高路簡迪等主力都有入選。球隊喺歐國盃決賽落敗之後，更加希望贏番場漂亮勝仗，省靚金漆招牌，特別係領隊迪甘斯即使獲得留任，但壓力未減，絕對輸唔起，今仗作客都要力爭凱旋而歸，先至可以向球迷交代。