國冠盃北美站另一場重頭戲巴黎聖日耳門（PSG）惡鬥車路士。車路士上仗對住半力出擊嘅紐約紅牛「落筆打三更」反輸2比4，一眾主力顯然未在狀態。相反PSG兩連勝愈踢愈有火，「讓球主客和」車仔要讓一球並唔合理，一於捧讓球主勝。（有線61及201台周日早上6時05分直播）

同大部分參加國冠盃嘅外隊一樣，車路士上場對紐約紅牛喺上、下半場都做咗大幅輪換，但勢估唔到上半場一班副選本來踢得唔錯，仲攞到領先優勢，點知換入夏薩特、迪亞高哥斯達、尼曼查馬迪和泰利等主力後，下半場竟然連失4球，而且幾個失波全因後防自己犯錯，可見心態及狀態仍有待改善。

聖日耳門心理佔優
反觀PSG喺頭兩場國冠盃連贏賓菲加及費倫天拿，信心、狀態明顯都比車仔優勝，除王牌射手伊巴謙莫域已經開齋，18歲小將桑奧古斯甸更個人入咗3球，勢成前線奇兵，加上幾名南美兵卡雲尼、大衞雷斯、堤亞高施華已悉數歸隊，可以候命上陣，兵源調動唔會輸蝕。兩軍近年喺歐聯非常有緣，對上兩屆4次碰頭PSG只輸一次，上屆16強兩回合加埋曾3度落後最終仍淘汰對手，心理上絕對唔驚車仔，今場有得受讓，絕對抵捧。