國冠盃「中國站」米蘭打吡移師深圳爆發，AC米蘭同國際米蘭兩軍今夏大灑金錢增兵，分別引入優質新援，力圖復興王朝。今日異地相逢，雖然只係熱身盃賽，但兩大死敵都渴望擊敗對手，為新球季壯行色，預料會火併大晒冷，首選入球大。（有線61、64、201、203台周六晚8時直播）

AC國米鋒力齊升呢
米蘭雙雄上季成績令人失望，AC僅排第10，老闆貝魯斯干尼終於肯使錢增兵，用咗超過3,000萬歐元，收購卡路士巴卡同雷斯阿祖安奴。哥倫比亞國腳卡路士巴卡上季西甲為西維爾轟入20球，仲捧埋歐霸盃；巴西射手雷斯阿祖安奴上屆歐聯為薩克達入咗9球，兩人拍住上，火力之猛令人期待。另陣中仲有文尼斯、本田圭佑等進攻好手，相信AC入波唔成問題，可惜防線上冇乜補強，頭重腳輕下恐難保清白之身。

國米前鋒莫路伊卡迪上季意甲轟入22球，教練文仙尼今夏又豪花3,500萬歐元收購摩納哥中場干度比亞，呢位法國新星好有韋拉影子，可提升國米中場控制力。另向巴塞借入右閘馬田蒙度亞，此子助攻力強，可打晒整條右路，國米側擊應會成為新亮點。雙方都有猛將助陣，有更多本錢踢進攻足球，入波唔會少，捧大啱數。