曼城連場變陣照全勝
今晚英超曼城主場對韋斯咸，又到哥迪奧拿玩「變陣魔法」表演時間，呢位西班牙名帥今季執教曼城後，頻頻玩輪換變陣，最犀利係無論點玩嘢，都可以贏波，甚至大勝，盡顯大師級風範。至於韋斯咸狀態低迷，衰到喺歐霸盃被羅馬尼亞球隊艾斯特拉淘汰，今趟去曼市比賽，恐怕會淪為哥帥嘅「玩物」，曼城讓1.5/2球，都要上盤。

（Now 621、樂視周日晚11時直播）

哥迪奧拿喺開鑼戰對新特蘭，竟然安排左閘高拉洛夫打中堅，但一樣全取3分，上輪聯賽又將4231陣式改為433，大勝史篤城4比1，下半場換入洛尼圖，即刻梅開二度，充分反映哥帥神級調動，的確非常犀利，率領曼城連盃賽開季後4戰全勝。由於哥迪奧拿仲未有一套固定正選陣容，加上強如鋼門赫特、中場耶耶托尼都被投閒置散，其他球員更加不敢怠慢，需落力爭取表現。曼城上仗歐聯附加賽以副選出擊，阿古路等主力獲輪休，今仗猛虎出柙，應有上佳演出。

韋斯咸當黑近況差
韋斯咸雖然一早開操備戰歐霸盃，但狀態一直冇起色，當中第3圈外圍賽作客輸畀斯洛文尼亞球隊當姆薩尼，上仗附加賽主場不敵艾斯特拉，搞到出局。「錘仔幫」表現遠不如上季，好大程度上因為中場主力皮耶踢完歐國盃後遲歸隊，開季後僅於對車仔一戰後備上陣，新兵阿休受傷長抖，打亂領隊比歷部署，真係黑仔。睇埋韋斯咸近6次作客曼城，輸咗5次，今仗凶多吉少。