新箭當紅 舊矛搶韁
英超嚟到第三輪聯賽，今晚早場有熱刺主場迎戰利物浦。雙方今季都喺中前線增兵加強攻力，熱刺以1億港幣收購中場雲耶馬，首場「地標戰」即有貨交，一班舊將好似哈利卡尼、基斯甸艾歷臣、迪利阿里等攻擊球員，今晚一定嗱嗱聲入番粒挽回面子喇；利物浦新兵韋拿杜姆就講到明要做紅軍嘅贏波英雄，仲定下今季最少入10球為目標。兩隊過去交親手，成日都有入球騷睇，相信今晚都唔例外，大細中位數2.5球，大盤係明智之選。
（Now 621及樂視周六晚7時30分直播）
雲耶馬有料激發眾鋒將
熱刺喺英超開咧戰只能夠同愛華頓踢成1比1，失分之餘仲要輸埋人，隊長兼門將洛里斯拉親左大腿腿筋，預計要唞4個禮拜。雖然冇咗法國一號門神，但二號門將禾姆上場對水晶宮表現對辦，由修咸頓以1,100萬鎊（約1.17億港元）加盟熱刺嘅雲耶馬，喺主場「地標戰」就一箭定江山，協助球隊以1比0小勝水晶宮。呢位25歲當打中場，第一場為球隊披甲上陣就喺主場球迷面前入波，信心大增！相信有佢喺中場發辦，球隊嘅中前場火力會比上季更加強勁！仲有，射手哈利卡尼、基斯甸艾歷臣、迪利阿里同拉美拿等一班攻擊手，喺季前熱身賽表現出色，相信佢哋今晚會爭住喺白鹿徑球場入波「騷哥利」！
韋拿杜姆：今季起碼入10球
另邊廂，紅軍發揮唔穩定就梗架喇！佢哋上場聯賽爆冷不敵升班馬般尼，但喺聯賽盃又作客大勝英冠伯頓5比0。不過贏波輸人，今季第一次正選上陣嘅中場安利簡恩，下半場一次冇同任何球員接觸嘅情況下受傷，仲即刻被換出，今晚上陣成疑。簡恩幾時復出就未知，但有另一件事就可以肯定，就係前鋒巴洛迪利將來好大機會唔會再為紅軍出戰任何正式比賽。呢位曾經幫意大利贏得歐國盃亞軍嘅昔日歐洲金童獎得主，今時今日已被貶至同青年軍練波喇！所以今季紅軍就靠由紐卡素轉投利物浦嘅中場韋拿杜姆擔大旗，呢位荷蘭球星揚言今季至少幫紅軍入10球。除此之外，菲臘比古天奴連同聯賽盃有入波嘅羅拔圖法明奴，加埋史杜列治，狀態一流，前線攻力唔惹少。睇埋往績方面，雙方近6次交手，有4次都係開大。預計今晚兩隊會夾手夾腳做大騷。
