今晚英超壓軸戰，兩支「長勝軍」交鋒，侯城主場對曼聯，新升班嘅「老虎」侯城連挫上季英超盟主李斯特城及史雲斯後，周中英聯盃又贏波，果然虎虎生威。不過曼聯由莫連奴執教下，亦重拾霸氣，連社區盾在內3連勝，新加盟前鋒伊巴謙莫域更3戰入4球。雙方心雄勢必鬥攻，中位數2.5球，捧入球大。

（Now 621、樂視周日凌晨零時30分直播 ）

看守領隊費蘭爭坐正
侯城現時看守領隊費蘭，球員時期效力過曼聯5年，退役後擔任紅魔傳奇主帥費格遜嘅助手，但當費Sir年退休後，費蘭立即被炒魷，今仗重遇舊東家，肯定想贏波攞彩。事實上，費蘭亦希望坐正做「長工」，勢必使出渾身解數，爭取爆冷贏曼聯，增添籌碼。

曼聯今季有兩位巨星伊巴謙莫域及保羅普巴加盟，仲有莫連奴領軍，實力大升級，淨係1個伊巴謙莫域已足以反轉侯城防線。加上兩隊近8次交手，曼聯贏咗7次，今仗全取3分機會高。不過紅魔鬼後防麻麻，早前作客般尼茅夫都失波，客勝賠率乏味，最好揀入球大。