拜仁新帥撥開烏雲
新一季德甲今晚開鑼，衞冕拜仁慕尼黑主場迎戰雲達不來梅，拜仁新帥安察洛堤未開咧已被捧上天，經過贏得德超盃同德國盃首圈輕鬆大勝，德國媒體大讚佢將拜仁帶返正軌，有望重溫2013年五冠王好夢，拜仁今晚遇上級數同狀態都輸條街嘅不來梅，推介﹝-2﹞嘅讓球主勝。
（Now 670周六凌晨2時30分直播）
拜仁過去三季喺哥迪奧拿帶領下，雖然聯賽連冠，但歐聯一敗塗地，哥帥同傳媒關係亦差，被批評盲目追求控球，搞到球隊唔敢博、唔鬥得、亦唔守得。今季拜仁換上德高望重嘅「老好人」安察洛堤執教，球隊季前喺德超盃兩球輕取宿敵多蒙特，然後德國盃首圈大炒卡爾斯耶拿5蛋，表現清風送爽，陰霾盡去，德國傳媒立即將佢「封神」，認為拜仁喺佢帶領下有4大躍進：搶拚更硬朗、進攻更直接、更懂得運用死球戰術、同攻守更平衡，深信佢可以帶領拜仁重返2013年巔峰。除咗傳媒，球員亦爭相支持，列貝利指喺佢帶領下，球員得到更多自由度，可以盡展各自所長；羅拔利雲度夫斯基亦話：佢嘅戰術令拜仁進攻更有效率，深信自己今季會取得更多入球。
拜仁今仗雖然唔算夫添，不過球隊兵源充足，即使迪亞高哥斯達、京士利高文、洛賓、出爐德國足球先生謝路美保定同新兵連拿度辛捷士因傷缺陣，安帥仍然可以從容排出強陣應戰，安察洛堤賽前話拜仁最好嘅球員同最差嘅球員，差距非常小，佢仲話球隊已經準備好了，今晚喺安聯球場會有好表現。
不來梅教練飯碗危危乎
雲達不來梅今季放走咗兩大主力安東尼烏查同維斯達加特，前後場實力都有所削弱，啱啱喺德國盃輸畀非聯賽球隊SF洛特，狀態差到暈，教練史基尼克正面臨信任危機，更被德國傳媒預測係今季最早被炒嘅德甲教頭。不來梅今仗前場兩大主力麥斯古斯同比沙路都有傷，作客安聯球場聽炒。
