另一場國冠盃比賽同樣戲碼十足，由兩支名牌球隊賓菲加同費倫天拿交手。呢兩隊波今季同樣遇到換帥兼陣容大變問題，但勝在攻力冇走樣，加上兩軍同樣未喺國冠盃開齋，怕且聽朝交手實搏盡死過，1.68倍入球大抵玩。（有線61、201及廣東體育周六早上8:05直播）

費倫新兵馬里奧蘇亞雷斯

落場跟操即有士哥
賓菲加今季搵咗雷爾域多利亞掌帥印，首戰鬥巴黎聖日耳門唔算失禮，上半場憑住巴西孖寶莊拿斯干卡維斯、安達臣泰列斯卡建功領先對手2:1，可惜下半場無以為繼輸2:3完場。其實又唔怪得晒雷帥嘅，話晒球隊中場彭利拿、後衞羅利斯賓尼圖、門將阿度亞全部離隊，後防點都要重新適應，今仗嚟多鋪以攻代守唔奇喎。

另邊廂費倫天拿今季同樣陣容大變，4線都有球員出走，當中影響最大非中堅史提芬沙域同門將尼圖莫屬，搞到新帥保羅蘇沙勁頭痕，上仗慘敗聖日耳門2:4就知後防幾唔掂。唯一安慰係主力祖亞昆、基奧斯比羅斯齊齊開齋，總算Keep到火力。加上尋日由馬體會轉投嘅新兵馬里奧蘇亞雷斯，首日落場跟操即有波入，狀態唔錯，有條件同賓菲加駁火做「大」騷。