歐洲列強忙緊踢季前熱身賽，德乙今晚就靜靜雞開咧，開鑼戰由杜伊斯堡火併凱沙羅頓。新升班嘅杜伊斯堡雖然係降班熱門，不過話晒時隔兩年重返德乙，加埋班波喺上季聯賽地頭不敗，主場出擊肯定想做齣好戲，況且凱沙羅頓出名作客渣，杜伊斯堡受讓平半，1.95倍「下盤」博得過。（開賽時間：周六凌晨2:30）

主場3萬波飛一早賣晒
根據德國IFAK足球機構作出嘅調查顯示，杜伊斯堡市平均每3個人就有1位係杜伊斯堡球迷，難怪今晚場德乙開鑼戰備受注目，主場約3萬張波飛晨早售罄。會方今夏執咗幾件免費球員，當中以前科隆鋒將湯馬士布卡最有名氣，今仗食粥食飯就靠晒佢咯。

凱沙羅頓上季作客得3勝
冇錯，凱沙羅頓去季爭啲就升班，實力照計係可以挑戰德甲，弊在佢哋作客成績曳係不爭嘅事實，上季17戰只係贏過3場咁大把，睇怕對住上年德丙主場不敗嘅杜伊斯堡，隨時又踩蕉皮。

再講，主帥雲查治今季委任左閘基斯路維擔任新隊長，又喺轉會市場簽入11位新兵，休季期間勁多搞作，考慮到一班新兵磨合需時，而且仲有班主力好似奇雲史杜加、韋利柯賓等離隊後亦要時間適應，今晚要讓波有危機。