國冠盃「北美站」明早有場賓菲加大戰費倫天拿，葡超冠軍賓菲加崇尚進攻足球，一對巴西前鋒莊拿斯干卡維斯、洛迪高利馬上季聯賽共轟入39球，火力強勁。不過，費倫天拿教練保羅蘇沙係賓菲加名宿，應該有破敵之計，射手基奧斯比羅斯已經擺脫傷患，上仗國冠盃仲有波入。兩隊踢得開放，首選捧入球大。（有線61、201台周六早上8時05分直播）

賓菲加極之「森巴化」，上仗國冠盃正選陣容竟有6位巴西球員，包括王牌進攻組合莊拿斯干卡維斯、洛迪高利馬，前者更取得入球，鬥攻之下，僅以2比3不敵富豪球隊巴黎聖日耳門，但踢出悅目足球，仍贏得掌聲。事實上，賓菲加屬於葡超班霸，喺國內比賽慣採主攻，對撕破對手密集甚有心得，預料熱身賽亦會演練進攻為主，相信今仗會壓前強攻費倫天拿。

基奧斯比羅斯傷愈回勇
費倫天拿上季表現出色嘅穆罕默德沙拿已離隊，但仍不乏優秀進攻球員，包括馬里奧高美斯、祖亞昆等，最難得係「玻璃腳」基奧斯比羅斯已傷愈，呢位意大利射手如非近年飽受傷患困擾，事業應可更上一層樓，佢上仗對聖日耳門亦射入12碼，有助重拾信心。

不過費倫防守一向麻麻，門將尼圖已轉投祖雲達斯，上仗由達泰魯辛奴把關卻要失4球，今仗隨時前面入埋唔夠後面輸，捧大正路。