聽朝美職獨腳戲由皇家鹽湖城主場對肯薩斯體育會。肯薩斯體育會最近連贏5場氣勢如虹，但要留意當中有4場係主場賽事，今仗作客未必會太進取。鹽湖城部分主力被徵召踢美洲金盃，令近排踢法偏向穩陣，加上雙方近7次交手都係半場不分勝負，2倍嘅半場和值捧。（TVB 301周六早上11時直播）

鹽湖城最近兩場賽事都順利贏波，今仗係球隊第3場喺主場出擊嘅賽事，雖然有後衞奧拿夫因傷缺陣，而利文度同碧卡文要代表美國踢美洲金盃無法上陣，但球隊主場演出有保證，近11仗未輸過之餘仲攞到6勝5和嘅成續，表現相當唔錯。鹽湖城近期踢法趨向穩陣，近6仗有5次開出半場和，相信係同部分主力踢緊美洲金盃有關，今仗仍有部分球員未歸隊，相信會沿用呢個穩陣嘅踢法。

近7次交手半場未分高下
肯薩斯體育會近期戰績穩步上揚，球隊連贏5場氣勢甚勁，不過當中只有對溫哥華白帽係作客賽事，今場造訪鹽湖城唔好諗住佢哋會好進取，事實上佢哋近4次客戰都開半場和。肯薩斯體育會今場有後衞伊基奧柏拉及安尼巴巴未好番，另一後衞施夫辛洛域同中場班拿度安羅上陣成疑，加上中場格拉咸素斯未歸隊，縱然射手當姆戴亞同基斯頓尼美夫近期頻頻有波入，但作客要攻破鹽湖城大門唔係易事。往績方面兩軍最近7次交手嘅半場都係分唔到勝負，阿謙相信今仗大有可能都會出現呢個情況，一於推介有2倍分頭嘅半場和畀大家。