今晚歐聯外圍賽附加賽首回合重頭戲，維拉利爾主場對摩納哥。西甲「黃色潛艇」維拉利爾突然冇咗重傷嘅射手蘇爾達杜，影響極大，就算簽入「歐聯快槍手」柏圖都唔幫得幾多，但摩納哥亦臨時有「老虎」法卡奧因傷缺陣，攻力大減，況且首回合大家會先求穩陣，唔敢冒進，今仗唔慌多波入，捧2.5球嘅入球細更好路。

（有線64及203台周四凌晨2時45分直播）

維拉利爾上季獲得西甲第4位，表現令人驚喜，但主力即成為豪門挖角對象，中堅艾歷拜利轉投曼聯，中場丹尼斯蘇亞雷斯被巴塞隆拿收購。屋漏偏逢連夜雨，射手蘇爾達杜早前熱身賽重創，估計要長抖半年，打擊非常大，搞到近3場熱身賽輸晒。雖然「黃色潛艇」喺上月尾簽入柏圖，呢位昔日「金童」曾喺2011年分組賽為AC米蘭作客巴塞，開波24秒就入波，成為歐聯史上第5快入球，但佢近年經常受傷患困擾，無復當年勇，上季季中由哥連泰斯外借去車路士都冇乜料到，唔好對佢寄予厚望。

另一邊廂，「老虎」法卡奧經過兩年英超黑暗歲月後，今夏返回摩納哥更頻頻入波，包括上圈歐聯外圍賽對費倫巴治兩回合賽事。可惜「老虎」因為左腳大腿肌肉拉傷，上仗聯賽已被收起，但由於佢仲未好番，主帥查甸喺剛公布嘅大軍名單中，無奈將佢剔走，前線只靠謝明一個孭重飛，勢必令火力大減。

上屆教訓首回合必守
摩納哥上屆正正係喺附加賽，被另一支西甲球隊華倫西亞淘汰，關鍵喺首回合作客一度追成1比1下，最終連失2球輸1比3，就算次回合返主場贏番2比1亦無濟於事。吸取上屆教訓後，預計摩納哥今仗造訪「黃色潛艇」會踢得保守，隨時變成拉布戰，中位數2.5球嘅入球細有1.54倍咪嫌少呀。