西班牙超級盃次回合，巴塞隆拿返主場再鬥西維爾。西維爾首回合落後0比2，今仗冇保留定必全力搶攻，巴塞嘅「MSN」組合雖然冇咗尼馬，不過頂替佢嘅蒙尼亞艾哈達迪都有好表現，今仗隨時上演入球騷，首選3.5球嘅大盤。
（now 632周四清晨5時直播）
西維爾今季由前智利國家隊領隊森柏奧利頂替轉投巴黎聖日耳門嘅艾美利領軍，雖然球隊喺熱身賽表現唔錯，不過近2仗面對實力較強嘅皇馬同巴塞即「現形」，後防加埋失咗4球，非常切合森柏奧利以往攻強於守嘅作風。西維爾近4次作客巴塞雖然全部輸晒，不過4次都能取得入球，從未試過吞蛋而回，既然落後0比2已經冇嘢再輸，作客魯營照攻。
美斯阿蘇撻着 攻力有保證
巴塞今仗繼續缺少正喺巴西出戰奧運嘅前鋒尼馬，但係其餘兩位「MSN」成員美斯、蘇亞雷斯已經上晒力，喺熱身賽代替尼馬上陣嘅蒙尼亞艾哈達迪亦頻頻有士哥，攻力唔使擔心，況且巴塞本周末嘅西甲開鑼戰同樣喺主場出擊，對手只係貝迪斯，唔使特別留力，為壯聲威必以贏波為目標，今仗隨時演入球騷。
