疲兵韋斯咸遇尅星
今晚歐霸外圍賽附加賽首回合，英超勁旅韋斯咸作客羅馬尼亞球隊艾斯特拉。唔好以為「錘仔幫」贏硬，上屆佢哋喺歐霸外圍賽提早出局，正正就係畀艾斯特拉淘汰，今次狹路相逢必定有好戲睇，不過「錘仔幫」近況差勁，啱啱喺英超新敗打擊士氣，今仗仲要讓波，寧捧受讓嘅艾斯特拉讓球主勝。

（周五凌晨2時15分開賽）

羅馬尼亞軍上屆對賽贏
韋斯咸上季喺主帥比歷帶領下，踢出漂亮足球之餘，仲遇強愈強，贏過利物浦、阿仙奴及車路士等傳統班霸，不過踢波嘅嘢一季還一季，連熱身賽在內，近4仗竟然輸咗3場，唔單止喺上圈歐霸外作客曾輸畀弱旅當姆薩尼，日前喺聯賽首輪一度追平之下，卻臨尾香遭絕殺不敵車路士1比2，都咪話唔打擊士氣。

除咗狀態同士氣差之外，韋斯咸僅僅3日又要赴羅馬尼亞打今仗，舟車勞頓體力輸蝕。查實「錘仔幫」上屆曾出戰歐霸外，去到第3圈，就係畀今仗對手艾斯特拉以總比數4比3踢出局，當中作客輸1比2，呢隊羅馬尼亞球隊不容小覷。韋斯咸嘅實力理應遠勝艾斯特拉，斯維只係懷疑佢哋對爭逐歐霸嘅戰意，況且新兵阿休剛戰傷出，中場核心皮耶歸隊冇耐未上力，能否復仇成功頓成疑問。斯維覺得韋斯咸上圈造訪當姆薩尼都輸得，只靠返主場贏波晉級，今仗作客實力更強嘅艾斯特拉，贏唔到有乜出奇，仲要讓波唔值博，梗係捧番對家讓球主勝。