西化精兵Vs烏合之眾
今晚英超上演「新東北打吡」，新特蘭主場對米杜士堡，紐卡素上季護級失敗降落英冠，好彩仲有米杜士堡升上英超，令「東北打吡」得而延續。米堡喺前皇馬名宿卡蘭卡率領下，進行西班牙化，有姿勢有實際。反觀新特蘭前主帥艾拿戴斯上月突然跳槽執教英格蘭國家隊，會方臨急聘請莫耶斯接手，呢位「天才」搵一批曼聯棄將幫手，可謂拉雜成軍，冇本錢讓波，捧受讓平半嘅米杜士堡下盤。

（Now 621、樂視周日晚8時30分直播）

米堡卡蘭卡領軍開局順
米杜士堡相隔7年重返英超，主帥卡蘭卡居功至偉，呢位施丹前皇馬隊友3年前接過米堡帥印後，先後引入多位西甲兵助陣，包括門將米積亞斯、後衞丹尼爾艾耶拉、翼衞尼素爾等，今夏再簽下前巴塞門將域陀華迪斯、華倫西亞後衞巴拿根、前鋒尼格度，配合前英格蘭國腳達寧，前中後三線人腳質素佳。其中曾效力曼城嘅尼格度，上仗已入波，可惜被史篤城逼和1比1。米堡開局唔錯，有助提升信心，遇上同屬東北地區嘅新特蘭，有力坐和望贏。

新特蘭莫耶斯專執平貨
「黑貓」新特蘭上季驚險護級成功，但主帥艾拿戴斯仍然選擇「跳船」，上月尾轉工擔任英格蘭領隊，會方竟然搵莫耶斯接任帥位。被球迷寸係「足球天才」嘅莫帥，之前執教曼聯及皇家蘇斯達都慘淡收場，失業咗近1年，「黑貓」仲夠膽請佢領軍，真係唔識驚。

事實上，新特蘭財力有限，難以羅致精兵良將，莫耶斯近期只係低價收購兩位曼聯年輕後衞麥尼亞、當奴路夫，以及借用贊奴沙，日前再簽入34歲愛華頓老將派拿。平嘢冇好嘢，莫耶斯執平貨，未見其利，先見其弊，上仗對曼城，因為麥尼亞擺烏龍而輸波。試問呢班烏合之眾，又點夠米堡「西化」精兵鬥呢？