英聯盃第2圈有大把選擇，伯頓今晚喺主場對利物浦，玩讓球客勝最穩陣。雖然紅軍走勢勁飄忽，但大家或者會發現，佢哋喺國冠盃開始後，走勢係輸1場後就贏1場嘅單跳局面，既然利物浦日前喺聯賽被般尼搞掂，今場係時候反彈啦！

（周三凌晨2時45分開賽）

伯頓升上英冠後最近走勢唔差，領隊尼祖哥洛夫球員時代仲效力過利物浦，可惜佢哋資金有限，升班後最重磅收購，只係以33萬鎊買入羅斯郡防守中場積臣艾雲，根本未夠料喺英冠爭取好成績，要同利物浦過唔去就更加難。

史杜列治復出搏殺
另一方面，利物浦陣中仲有唔少傷兵，不過射手史杜列治已經喺對般尼嘅英超復出，相信領隊高普有足夠籌碼喺今場搏殺。而且紅軍近7場錄得3勝4負，期間每次輸完都即刻贏波，包括打沉AC米蘭、巴塞隆拿同阿仙奴，伯頓唔似阻到紅軍反彈喎！