唱K耍太極好寫意
廣州恒大淘寶（足智彩譯FC廣州）今晚喺主場天河體育場對拜仁慕尼黑，唔值得冷敲。雖然恒大或者有新簽嘅羅賓奴登場，但佢哋近排連環出現傷兵，唔似頂得住。加上拜仁大軍喺中國之旅有得打乒乓波、唱K、夜遊上海灘甚至學耍太極，全隊心情大靚，想繼續玩梗係要開1.73倍「-2」嘅「讓球客勝」啦！

（now670台周四晚7:35直播）

恒大日前喺中超作客以3:1砌低FC遼寧，但有射手艾傑臣、黃博文、後衞張琳芃同李學鵬養緊傷。加上佢哋喺聯賽榜屈居次席，據講呢場好可能收起前鋒郜林、中場于漢超同中堅馮蕭霆，避免佢哋受傷，不過教練史高拉利就話好重視呢場比賽喎。

恒大傷兵成籮 新兵羅賓奴踢半場
至於新加盟嘅射手羅賓奴，佢自己就話好想踢，史高拉利話會畀佢踢45分鐘。拜仁日前喺上海以1:0砌低國際米蘭，正選陣容其實已經正常番好多，雖然最後只靠後備入替嘅馬里奧葛斯入波搞掂對手，但照睇佢哋唔會錯過中國之旅3連勝嘅機會。

拜仁宣傳省招牌唔Hea踢
冇錯拜仁都有唔少球員因傷冇歸隊，包括翼鋒洛賓同列貝利，但佢哋去中國主要為宣傳，又點會放過恒大！再講，拜仁球星喺中國玩得超開心，除咗湯馬士梅拿打乒乓波，堤亞高艾簡達拿同拿菲爾去唱K，紐亞拉隊夜遊上海灘，馬里奧葛斯仲跟靚女學耍太極添，叉滿電實想踢好波畀球迷睇。